Quldurlar bir həftə təqib edildikdən sonra İran gəmisini tərk etdilər
EUNAVFOR-un (Avropa İttifaqı Hərbi Dəniz Qüvvələri) "Atalanta" əməliyyat qüvvələri təxminən iki həftə əvvəl qaçırılan İran bayraqlı "Al Waseemi" balıqçı gəmisinin Somali quldurları tərəfindən tərk edildiyini təsdiqləyib.
“Seanews.az” xəbər verir ki, martın 24-də qaçırılan və digər iri gəmilərə hücum üçün "ana gəmi" kimi istifadə edilməsi planlaşdırılan bu gəmi İtaliyanın "Emilio Bianchi" və İspaniyanın "Canarias" freqatları tərəfindən yaxından izlənilərək mühasirəyə alınıb. Heyətin təhlükəsizliyi naminə birbaşa hərbi müdaxilə edilməsə də, hava və dəniz vasitələri ilə göstərilən davamlı təzyiq nəticəsində quldurlar aprelin 5-də gəmini tərk etməyə məcbur olublar. Gəmiyə daxil olan beynəlxalq qüvvələr dənizçilərə tibbi yardım göstərib, onları su və qida ilə təmin ediblər.
2008-ci ildən bölgədə sabitliyi qoruyan EUNAVFOR, xüsusilə musson mövsümləri arasındakı sakitlik dövründə quldurluq riskinin artdığını xatırladaraq gəmiləri ehtiyatlı olmağa çağırır.
