"K Line" avtomobil daşıyan gəmilərində bio-LNG istifadəsinə başlayır
Yaponiyanın "K Line" gəmiçilik şirkəti öz avtomobil daşıyıcı gəmilərində yanacaq qismində bio-LNG (bioloji mənşəli mayeləşdirilmiş təbii qaz) istifadə edəcəyini öhdəsinə götürüb.
“Seanews.az” xəbər verir ki, şirkət bu məqsədlə mayeləşdirilmiş biometanın (LBM) uzunmüddətli tədarükünü təmin edən müqavilə imzalayıb.
Yapon gəmi sahibi gözləyir ki, bu tədarük razılaşması ona istixana qazı emissiyalarını ildə təxminən 60,800 ton azaltmağa imkan verəcək.
"K Line" Avropa İttifaqının Bərpa Olunan Enerji Direktivinə (RED) uyğun dayanıqlılıq dərəcəsini təmin edən ISCC-EU sertifikatlı yanacaqdan istifadə edir.
Şirkət 2050-ci ilə qədər xalis sıfır istixana qazı emissiyasına nail olmaq hədəfini qoyub. Bu məqsədlə LNG ilə işləyən gəmilərin istismara verilməsi üzərində çalışır və bio-LNG-nin davamlı istifadəsi bu hədəfə çatmaq üçün əsas təşəbbüslərdən biri hesab olunur.
