Kil kanalı ilə 77,2 milyon ton yük daşınıb
2023-cü ildə Almaniyanın Kil kanalı ilə 77,2 milyon ton yük daşınıb ki, bu da bir il əvvəlkindən (82,2 milyon ton) 6,2% azdır.
“Seanews.az” xəbər verir ki, 2023-cü ildə kanaldan 26 659 gəmi keçib (2022-ci ildə - 26 882 gəmi).
2023-cü ildə kanaldan keçən gəmilərin 12 152-si quru yük gəmisi, 3 483-ü tanker və 3 293-ü konteyner gəmisi olub. Daha çox yük İsveç və Niderland (1398 səfər), Polşa ilə Niderland (1120 səfər) və İsveç ilə Böyük Britaniya/Şimali İrlandiya (870 səfər) arasındakı marşrutlarda daşınıb.
Kanal boyunca Rusiya limanlarına gedən və gələn nəqliyyatın hərəkəti azalmaqda davam edir. Belə ki, 2021-ci ildə Kil kanalından 2771 gəmi keçibsə, 2022-ci ildə bu göstərici 1420-yə, 2023-cü ilin sonunda isə 43,1% azalaraq 807-yə düşüb. Daşınan yüklərin həcmi 2022-ci ildəki 5,7 milyon tondan 2023-cü ildə 2,6 milyon tonadək (mənfi 53,9%) azalıb. Müqayisə üçün qeyd edilir ki, 2021-ci ildə Rusiya gəmiləri ilə daşınan yüklərin həcmi 14,2 milyon ton qiymətləndirilib.
“Kil kanalı əvəzsiz beynəlxalq dəniz nəqliyyatı marşrutu rolunu təsdiqləyib. Qlobal təsir və digər pozuntular daşımalara yalnız cüzi təsir göstərib. Şimal və Baltik dənizləri arasında təhlükəsiz əlaqə nəqliyyat marşrutlarının mühüm hissəsi olaraq qalır. Kanalın genişləndirilməsi üzrə tədbirlər isə onu gələcəkdə daha etibarlı edəcək”, - deyə Almaniyanın Su Yolları və Gəmiçilik Baş İdarəsinin rəhbəri Erik Ohlman bildirib.
