Somali sahillərində qaçırılan gəmi Aİ hərbi gəmiləri tərəfindən mühasirəyə alındı
Avropa İttifaqının "ATALANTA" hərbi-dəniz missiyası martın sonlarında Somali sahillərində qaçırılmış İran bayraqlı "ALWASEEMI 786" adlı ənənəvi yelkənli balıqçı gəmisini yaxından izləməkdə davam edir.
“Seanews.az” xəbər verir ki, martın 24-də Moqadişudan 400 dəniz mili şərqdə piratlar tərəfindən ələ keçirilən bu gəmidən, adətən olduğu kimi, açıq dənizdəki daha böyük gəmilərə hücum etmək üçün "ana gəmi" qismində istifadə ediləcəyi ehtimal olunurdu.
Hadisə ilə bağlı Hind okeanı Dəniz Təhlükəsizliyi Mərkəzi (MSCIO) ərazidəki digər gəmilərə xəbərdarlıq edərək, qaçırılan gəmidən 200 mil radiusda uzaq durmağı və təhlükəsizlik tədbirlərini gücləndirməyi tövsiyə edib.
Martın 25-dən etibarən "ATALANTA" hərbi gəmiləri hədəfə yaxınlaşaraq vəziyyəti nəzarətə götürüb və havadan kəşfiyyat vasitəsilə gəmidəki durumu qiymətləndirib. Görülən operativ tədbirlər nəticəsində qaçırılan gəmi tamamilə təcrid olunub və onun digər iri gəmilərə hücum etmək imkanları dondurulub.
Hazırda Somali sahillərinə doğru hərəkət edən gəmi iki hərbi aktiv tərəfindən izlənilir. "ATALANTA" missiyası heyətin azad edilməsi və piratların müəyyən olunması üçün Somali hakimiyyəti, yerli sahil mühafizə qüvvələri və INTERPOL daxil olmaqla beynəlxalq tərəfdaşlarla sıx əməkdaşlıq edir.
