Yeni indeks gəmi yanacağı alarkən gizli əlavə xərcləri üzə çıxarır
"Hafnia" şirkətinin törəmə müəssisəsi olan "Studio 30 50" gəmi yanacağının (bunker) real xərclərini müəyyən edən yeni "FuelSure” şəffaflıq indeksini istifadəyə verib.
“Seanews.az” xəbər verir ki, bu yeni rəqəmsal platforma gəmi sahiblərinə yalnız hesab-faktura qiymətinə deyil, yanacağın gətirdiyi gizli xərclərə və səmərəliliyə əsaslanaraq qərar verməyə imkan yaradır.
Sistem gəmi yanacağının çatdırılma sənədlərini (BDN), laboratoriya analizlərini və əməliyyat hesabatlarını (SOF) süni intellekt vasitəsilə vahid bazada toplayaraq təhlil edir. Müxtəlif mənbələrdən gələn datalar əsasında hər bir yanacaq partiyası üçün "rəqəmsal pasport" yaradılır.
7 milyon tondan çox yanacaq əməliyyatının təhlili göstərir ki, bunker yanacağının iqtisadiyyatı "ton başına qiymət" anlayışından qat-qat dərindir. Eyni spesifikasiyalı yanacaqların faydalı enerji dəyəri fərqli ola bilər. Bu isə gəmilərin eyni sürəti yığmaq üçün daha çox yanacaq yandırmasına səbəb olur.
Bundan başqa, çatdırılma gecikmələri, tələsik yükləmələr və laboratoriya mübahisələri yanacağın real maya dəyərini hər ton üçün bir neçə dollar, bəzən isə daha çox artırır.
Məhz "FuelSure” platformasının köməyi ilə gəmi sahibləri artıq ən ucuz deyil, ən dürüst və yüksək enerji verən təchizatçıları statistik məlumatlar əsasında seçə bilirlər.
Gəmi sahibləri bu sistemi tətbiq etmək üçün əlavə avadanlıq quraşdırmadan mövcud əməliyyat məlumatlarını platformaya inteqrasiya edirlər.
"Studio 30 50" analitiki Lukas Mörfi bildirib ki, bu yanaşma dənizçilik şirkətlərinə illik milyonlarla dollar qənaət etməyə imkan verir.
