Dünyada bir ilk: dəniz dibi məlumatları "bulud"a köçürüldü
İsveçrənin robototexnika şirkəti “Hydromea” və Norveç enerji nəhəngi “Equinor”, okean dibindən yüksək ötürücülük qabiliyyətinə malik simsiz məlumatların birbaşa "bulud" (cloud) infrastrukturuna ötürülməsini dünyada ilk dəfə uğurla sınaqdan keçirib.
“Seanews.az” xəbər verir ki, sınaq zamanı "Hydromea" şirkətinin LUMA adlı optik rabitə cihazlarından istifadə olunub. Bu cihazlar dəniz dibindəki məlumatları "Equinor"un DEEPNET şəbəkəsi vasitəsilə birbaşa şirkətin bulud bazasına ötürüb.
Sistem 6000 metr dərinliyə qədər 10 Mbps sürətlə məlumat ötürə bilir. Bu, sualtı müdaxilə dronlarının (UID) pilotlarına və mühəndislərə məlumatlara anında çıxış imkanı yaradır.
Bu üsul ənənəvi kabelli monitorinq və ya gəmi vasitəsilə məlumat toplama üsulları ilə müqayisədə xərcləri, ekoloji təsirləri və riskləri kəskin şəkildə azaldır.
Yenilik sualtı avtonom əməliyyatların inkişafı üçün mühüm addım kimi qiymətləndirilir.
