Yeni nəsil ammonyak mühərriklərinin hazırlanması prosesinə start verilib
Sinqapur Milli Universiteti yeni bir tədqiqat layihəsinə başlayıb. Məqsəd qlobal gəmiçilik sənayesində karbon qazının azaldılmasını sürətləndirməkdir. Bunun üçün yeni nəsil, yüksək səmərəli və sıfıra yaxın emissiyalı ammonyak mühərrikləri hazırlanır.
“Seanews.az” xəbər verir ki, layihənin mərkəzində “Silindrdaxili riforminq vasitəsilə qazın təkrar dövriyyəsi” (IRGR) adlı yeni mühərrik konsepsiyası dayanır. Bu texnologiya ammonyakın dəniz yanacağı kimi istifadəsinə mane olan çətinlikləri aradan qaldırmaq üçün yaradılıb. Layihə rəhbəri, dosent Yanq Venminq bildirib ki, bu sistem həm yanma səmərəliliyini artırır, həm də havaya buraxılan ammonyak və digər zərərli maddələri kəskin azaldır.
Layihə geniş tərkibli bir konsorsium tərəfindən icra olunur. Tərəfdaşlar hesab edirlər ki, bu təşəbbüs təkcə texnoloji yenilik deyil, həm də Sinqapurun dənizçilik statusunu gücləndirmək məqsədi daşıyır. Ölkə bu sahədə sənaye əməkdaşlığını və kadr hazırlığını genişləndirərək, innovasiya mərkəzinə çevrilməyi hədəfləyir.
Tədqiqatın üç il davam etməsi gözlənilir. Komandanın əsas hədəfi gələcəkdə bütün dünyada sıfır emissiyalı gəmilərdə istifadə edilə biləcək böyükmiqyaslı mühərrik modelləri hazırlamaqdır.
