ABŞ-dan tanker operatorlarına 20 milyard dollarlıq sığorta qalxanı
Hörmüz boğazında gərginliyin pik həddə çatması və tanker hərəkətinin dayanması fonunda, ABŞ hökuməti dəniz daşımalarında yaranan boşluğu doldurmaq üçün hərəkətə keçib.
“Seanews.az” xəbər verir ki, ABŞ Beynəlxalq İnkişaf Maliyyə Korporasiyası (DFC) Körfəz regionunda üzən gəmilər üçün 20 milyard dollarlıq təkrar sığorta (reinsurance) paketi elan edib.
Bu addım sığorta bazarındakı qeyri-müəyyənliyi aradan qaldırmaq və yüksək risk səbəbindən boğazdan keçməkdən çəkinən gəmiçilik şirkətlərini yenidən marşrutlara qaytarmaq məqsədi daşıyır.
Zəmanət paketi ilk növbədə gəmi gövdəsi, maşın-mexanizmlər və daşınan yükün hərbi risklərdən sığortalanmasına yönəlib.
Sığorta təminatı növbəli prinsipi ilə tətbiq olunmaqla, real vaxt rejimində gəmilərin təhlükəsiz keçidini maliyyələşdirməyə imkan verəcək. Planın təhlükəsizlik tərəfi ABŞ Mərkəzi Komandanlığı (CENTCOM) ilə birgə idarə olunacaq ki, bu da sığortalanan gəmilərin hərbi müşayiət ehtimalını artırır.
