Poti limanı vasitəsilə LPG tədarükü nəzərdən keçirilir
Rusiya Gürcüstan limanı vasitəsilə Bolqarıstana mayeləşdirilmiş karbohidrogen qazı tədarük etmək istəyir.
“Seanews.az”-ın məlumatına görə, iyulda Surqutdan Varnaya 3 min ton qazın çatdırılması nəzərdə tutulub. Digər əsas ixrac marşrutları ilə məhdud satış imkanları səbəbindən Poti vasitəsilə LPG tədarükü nəzərdən keçirilir.
LPG-nin Surqutdan Poti vasitəsilə Bolqarıstana dəmir yolu ilə daşınması Ukrayna vasitəsilə Aİ-yə çatdırılandan təxminən 50% bahadır. Surqutdan Potiyə belə tranzit bir ton üçün 260-280 dollara, Poti ilə Varna arasında bərə ilə isə bir ton üçün 130-150 dollara başa gəlir. Eyni zamanda, Rusiya Federasiyasında LPG-nin qiymətlərinin aşağı düşməsi fonunda bu marşrutla çatdırılmalar daxili bazarda satışla müqayisədə sərfəli görünür.
“Refinitiv Eikon” analitik şirkətinin məlumatına görə, məhdud ixrac imkanları Rusiyadan xaricə LPG tədarükünün əhəmiyyətli dərəcədə azalmasına səbəb olub. 2022-ci ilin əvvəlində ayda təxminən 370 min tondan may ayında 250 min tona düşüb.
