Yunanıstan ölkənin gəmiçilik donanmasına xəbərdarlıq etdi
“Seanews.az” xəbər verir ki, Yunanıstan hökuməti Qara dənizdə son dron hücumlarından sonra ölkənin gəmiçilik donanmasına təhlükəsizlik tədbirlərinin maksimum səviyyəyə qaldırılması barədə xəbərdarlıq edib.
Yunanıstanın Gəmiçilik Nazirliyinin yaydığı məlumata görə, bu həftə Qara dənizdə Rusiyanın limanlarına doğru hərəkət edən Yunanıstan tərəfindən idarə olunan iki tankerə dronlarla hücum edilib. Hücuma məruz qalan gəmilərdən biri ABŞ-ın iri neft şirkətlərindən biri olan “Chevron” tərəfindən icarəyə götürülüb və Xəzər Boru Kəməri Konsorsiumunun Rusiyanın Qara dəniz sahilində yerləşən dəniz terminalına istiqamətlənib.
Nazirlik bütün Yunanıstan gəmilərinə, xüsusilə də sözügedən terminallarda lövbər salan və ya yan alan gəmilərə mümkün olan ən yüksək təhlükəsizlik tədbirlərinin görülməsini tövsiyə edib. Tövsiyələrə əsasən, heyət üzvlərinə zəruri olmadıqda açıq göyərtədə hərəkət etməmək tapşırılıb.
Nazirlik daha əvvəl yaydığı sənədlərdə də Qara dəniz və ona bitişik dəniz ərazilərində fəaliyyət göstərən gəmilər üçün risklərin yenidən qiymətləndirilməsini tövsiyə edib. Bildirilib ki, xüsusilə Rusiyanın Novorossiysk, Taman, Tuapse və Kavkaz limanları istiqamətində hərəkət edən gəmilər üçün təhlükə səviyyəsi yüksək olaraq qalır.
Qeyd olunur ki, Qara dənizə üzən gəmilər üçün hərbi risk sığortasının dəyəri də bu həftə kəskin artıb. Bu isə bölgədə təhlükəsizlik risklərinin artdığını göstərir.
Yunanıstan tərəfindən idarə olunan tanker donanması Qara dəniz regionunda ticarət üçün mühüm rol oynayır. Qara dəniz hövzəsi Bolqarıstan, Gürcüstan, Rumıniya və Türkiyə ilə yanaşı, müharibə vəziyyətində olan Rusiya və Ukraynanın sahillərini əhatə edir.
