“Wärtsilä” 2026-cı ildə gəmiçiliyin dekarbonizasiya gündəmini formalaşdıracaq əsas trendləri açıqlayıb
Texnologiya qrupu "Wärtsilä" 2026-cı ildə qlobal gəmiçilik sektoruna təsir edəcək dörd əsas tendensiyanı müəyyən edib. Şirkətin açıqlamasına görə, bu trendlər gəmilərin rəqabət qabiliyyəti, səmərəliliyi və dayanıqlılığı baxımından həlledici rol oynayacaq.
"Seanews.az" xəbər verir ki, əsas istiqamətlərə gəmi ömrü boyunca optimallaşdırma, çevik dekarbonizasiya strategiyaları, mövcud gəmilərin modernləşdirilməsi (retrofit) və rəqəmsallaşma ilə böyük verilənlərdən istifadə daxildir.
“Wärtsilä”nın dəniz bölməsinin rəhbəri Roger Holm qeyd edib ki, 2026-cı ildə gəmiçiliyin dayanıqlı transformasiyası üçün əməkdaşlıq əsas amil olacaq. Onun sözlərinə görə, alternativ yanacaqlara keçidi sürətləndirmək üçün texnologiya istehsalçıları, operatorlar, limanlar və tənzimləyici qurumlar birgə fəaliyyət göstərməlidir.
Şirkət vurğulayıb ki, regional tənzimləmələr, o cümlədən Avropa İttifaqının emissiya tələbləri, sektor üçün əlavə çağırışlar yaradır və bu səbəbdən uyğunluq, hesabatlılıq və rəqəmsal həllər daha da ön plana çıxır.
Məlumatda o da qeyd olunub ki, gəmi sahibləri qısamüddətli həllərdən uzaqlaşaraq uzunmüddətli və mərhələli yanaşmalara üstünlük verməyə başlayıb.
