Gəmiçilik sahəsində baş verən ən son hadisələrdən anında xəbərdar olmaq üçün bizi izləyin

OK

X

  • Bakı, 2023-02-09,
Seanews
Heyder Eliyev

“Wartsila” və tərəfdaşları "yaşıl" ammonyakla işləyən yük gəmisinin yaradılması üzərində çalışırlar

“Green NortH2 Energy”, “Meriaura” və “Wartsila” gəmi yanacağı kimi "yaşıl" ammonyakdan istifadə edəcək yük gəmisi yaratmaq niyyəti haqqında müqavilə imzalayıblar.

“Seanews.az”ın məlumatına görə,  gəmi modul tipli çox yanacaqlı əsas mühərriklərlə təchiz olunmalıdır. Belə mühərriklər gəmini istismar edəcək Finlandiyanın “Meriaura” nəqliyyat və logistika şirkətinin sifarişi ilə “Wartsila” tərəfindən təchiz ediləcək. “Green NortH2 Energy” bərpa olunan enerji mənbələrindən istifadə etməklə istehsal olunan ekoloji cəhətdən təmiz "yaşıl" ammonyakın tədarükünə cavabdeh olacaq.

Tərəfdaşlar 2024-cü ildə belə bir gəmi almağı, 2026-cı ildə isə “yaşıl” yanacaq üzərində işə başlamağı planlaşdırırlar.

Layihənin tərəfdarları hesab edirlər ki, ekoloji cəhətdən təmiz ammonyak gəmiçilikdən yaranan istixana qazı emissiyalarının azaldılmasında mühüm rol oynayacaq, çünki sənayenin enerji ehtiyacı akkumulyator texnologiyası ilə ödənilə bilməz. Hidrogenlə müqayisədə ammonyakı saxlamaq və nəql etmək daha asandır və onun logistik şəbəkəsi artıq mövcuddur.

Gələcək gəmi “Meriaura”nın donanmasında açıq göyərtəli gəmilərlə birlikdə ağır layihə yüklərinin daşınması üçün istifadə olunacaq. Ammonyakdan əlavə, belə bir gəmi bioyanacaq və ya dizel yanacağı ilə işləyə bilər.

Layihə “Elomatic” (“Green NortH2 Energy”-nin ana şirkəti) və “Meriaura” arasında Saima gölündə üzgüçülüyün bərpası üçün gəmilərin layihələndirilməsi üzrə əməkdaşlığın davamıdır.

“Wartsila Corporation” (qərargahı Helsinki, Finlandiya) gəmiçilik, neft, elektrik və digər sahələr üçün mühərriklərin və sair sistemlərin layihələndirilməsi və istehsalı üzrə ixtisaslaşmışdır. 18 minə yaxın işçisi olan şirkət dünyanın 70-dən çox ölkəsində fəaliyyət göstərir.

Finlandiyanın 2021-ci ildə yaradılan “Green NortH2 Energy Oy” şirkəti isə təmiz enerji layihələri hazırlayır. Şirkətin hidrogen və ammonyak istehsalı  zavodları var.  Əsas səhmdarlar “Elomatic Oy” və “Flexens Oy Ab” konsaltinq və mühəndislik şirkətləridir. Yaxın gələcəkdə şirkət Naantalidə yaşıl hidrogen və ammonyak zavodu tikəcək.

Finlandiyanın “Meriaura Oy” (Turku) şirkəti 16 gəmidən ibarət donanması ilə Baltik, Aralıq dənizləri və Şimali Atlantika regionunda daşımalar həyat keçirir. “Meriaura” gəmilərdə bioyanacaqdan istifadə edən ilk gəmiçilik şirkətidir. Tullantılara əsaslanan bioyanacaqlar şirkətin öz zavodunda istehsal olunur. 


© Materiallardan istifadə edərkən hiperlinklə istinad olunmalıdır