Biskay körfəzində batmaqda olan yelkənli qayıqdan dörd nəfər xilas edilib
Biskay körfəzində güclü fırtına zamanı su dolmağa başlayan yelkənli qayıqdakı dörd nəfər uğurlu əməliyyat nəticəsində xilas edilib. Hadisə NYK və "Wallenius Lines" şirkətlərinin ortaqlığı olan UECC firmasına məxsus "Autosun" avtomobil daşıyan gəmisinin ərazidən keçdiyi vaxt baş verib.
“Seanews.az” xəbər verir ki, Madeyra qeydiyyatında olan 140 metrlik gəmi körfəzi keçərkən qayıqdan gələn təhlükə siqnalına dərhal reaksiya verib. Dənizdə dalğaların hündürlüyünün 4 metrə çatmasına baxmayaraq, "Autosun" gəmisinin heyəti İspaniya və Fransa xilasetmə mərkəzləri ilə koordinasiyalı şəkildə hərəkət edərək operativlik nümayiş etdirib. Nəhəng gəmi qayığa yaxınlaşaraq küləyin qarşısını kəsib və xüsusi bələdçi nərdivanı vasitəsilə dörd nəfəri bir neçə dəqiqə ərzində təhlükəsiz şəkildə göyərtəyə çıxarıb.
Gəmidə ilkin tibbi müayinədən keçən zərərçəkənlər daha sonra Fransa xilasetmə helikopteri ilə sahilə təxliyə olunublar. UECC rəhbərliyi fırtınalı hava şəraitində yüksək peşəkarlıq göstərən gəmi heyətinin rəşadətini xüsusi qeyd edib.
