Dünyada ilk dəfə pilotsuz gəmidən sualtı aparat buraxılıb
“ZeroUSV” Böyük Britaniya Kral Hərbi Dəniz Qüvvələrinin "Atlantic Bastion" proqramına dəstək nümayişi çərçivəsində dünyada bir ilkə imza atıb. Şirkət avtonom pilotsuz yerüstü gəmidən (USV) “Teledyne Slocum Ocean Glider” sualtı aparatını uğurla suya buraxıb.
“Seanews.az” xəbər verir ki, layihənin məqsədi avtonom pilotsuz gəmilərin uzunmüddətli sualtı sistemlər üçün necə buraxılış və dəstək platforması rolunu oynaya biləcəyini nümayiş etdirməkdir. Bu texnologiya sualtı əməliyyatlar zamanı böyük heyətli gəmilərə olan ehtiyacı azaldır.
"Atlantic Bastion" layihəsi Böyük Britaniya Müdafiə Nazirliyinin dəniz təhlükəsizliyi tapşırıqlarını, o cümlədən sualtı monitorinq və kritik sualtı infrastrukturun qorunmasını avtonom sistemlərlə necə təmin etmək olar sualına cavab axtaran genişmiqyaslı səylərinin bir hissəsidir. Nümayiş zamanı iki ədəd “Oceanus12” gəmisindən istifadə olunub və sualtı aparatların xüsusi sensorlarla inteqrasiyası sınaqdan keçirilib.
“ZeroUSV”nin icraçı direktoru və həmtəsisçisi Mettyu Ratsi bildirib ki, bu nailiyyət okean məlumatlarının toplanması üçün yeni bir əməliyyat modelinin başlanğıcıdır. Bu model hərbi kəşfiyyat, müşahidə, sualtı qayıqlara qarşı mübarizə və ətraf mühitin sürətli qiymətləndirilməsi missiyaları ilə yanaşı, kommersiya və elmi okeanoqrafik tətbiqlər üçün də vacibdir.
