Dəniz naviqasiyasında inqilab: GPS-siz və maqnit sahəsindən asılı olmayan yeni cihaz yaradılıb
Gəmiçilikdə ən böyük risklərdən biri GPS siqnallarının kəsilməsi və ya saxtalaşdırılmasıdır (jamming və spoofing). Norveçin texnologiya nəhəngi “Kongsberg Discovery” bu problemi həll edən yeni cihazını təqdim edib. Bu, şimalı avtomatik tapan və xarici siqnallardan asılı olmayan kiçik bir ölçmə cihazıdır (MEMS).
“Seanews.az” xəbər verir ki, “Kongsberg”in yeni cihazı heç bir peyk siqnalına (GNSS) və ya maqnit sahəsinə ehtiyac duymadan işləyir. Bu isə o deməkdir ki, siqnal kəsilsə belə, yolunuzu itirməyəcəksiniz, cihaz öz daxili sensorları ilə şimalı dəqiqliklə tapır.
Köhnə və ağır giroskopik sistemlərdən fərqli olaraq, bu yeni texnologiya həm çox kiçik, həm də olduqca yüngül quruluşa malikdir, bu da onun istənilən sahəyə asanlıqla quraşdırılmasına imkan verir.
Sistemin digər bir üstünlüyü isə şiddətli vibrasiya, silkələnmə və kəskin temperatur dəyişikliyi kimi çətin dəniz şəraitində belə öz iş dəqiqliyini tam qoruyub saxlamasıdır.
Bunlardan başqa, cihazın həm enerji sərfiyyatı olduqca aşağıdır, həm də analoqları ilə müqayisədə maliyyə baxımından gəmi sahibləri üçün daha sərfəli bir həll təklif edir.
Bu yenilik təkcə böyük gəmilər üçün deyil, həm də sualtı robotlar (ROV və AUV), dronlar, dəniz kəşfiyyat aparatları və müdafiə sənayesi üçün nəzərdə tutulub.
“Kongsberg” bu sistemi martın 10-12-də Londonda keçiriləcək "Oceanology International" sərgisində canlı sınaqlarla nümayiş etdirəcək.
