Kvant kompüterlər liman planlaşdırmasında yeni imkanlar yarada bilər
Gəmiçilik və liman logistikasında ən çətin planlaşdırma məsələlərinin həlli üçün kvant kompüter texnologiyalarından istifadə perspektivləri müzakirə olunur.
“Seanews.az” xəbər verir ki, dəniz daşımalarında marşrutların qurulması və liman əməliyyatlarının planlaşdırılması olduqca mürəkkəb proseslərdir. Mütəxəssislərin fikrincə, çoxsaylı məhdudiyyətlər səbəbindən bu işlər, xüsusən də konteynerlərin yerləşdirilməsi yüksək dəqiqlikli hesablamalar tələb edir.
Bildirilir ki, kvant kompüterlər bu tip çətin optimallaşdırma problemlərini daha sürətli və dəqiq həll etməyə kömək edə bilər. Bu texnologiya klassik kompüterləri əvəz etmək üçün deyil, onlarla birlikdə işləyərək ən mürəkkəb hesablamaların aparılmasını asanlaşdırmaq üçün nəzərdə tutulur. Məsələn, limanda qəfil hava dəyişiklikləri, texniki nasazlıq və ya qatar qrafikində dəyişiklik baş verdikdə, kvant əsaslı həllər kranların, anbarların və yük əməliyyatlarının yeni plana uyğun daha səmərəli şəkildə yenidən qurulmasına kömək edə bilər.
Artıq Los-Anceles və Dubay kimi böyük logistika mərkəzlərində kvant texnologiyalarının tətbiqi üzrə ilkin layihələr həyata keçirilir. Mütəxəssislər hesab edirlər ki, bu texnologiya gələcəkdə limanların məhsuldarlığını artırmaq, gecikmələri azaltmaq və logistika xərclərini optimallaşdırmaq üçün mühüm rol oynaya bilər.
