Bütün donanmanın təhlükəsizliyi süni intellektə həvalə edilir
Çilinin “Ultranav” gəmiçilik qrupu süni intellekt əsaslı təhlükəsizlik sistemlərini bütün donanmasına tətbiq etmək üçün “ShipIn Systems” şirkəti ilə əməkdaşlığı genişləndirib.
“Seanews.az” xəbər verir ki, 400-dən çox gəmini idarə edən şirkət, əməliyyat risklərini daha erkən mərhələdə müəyyən etmək üçün "FleetVision" platformasını tətbiq edir.
Bu texnologiya gəmidəki mövcud kamera sistemləri ilə inteqrasiya olunaraq körpü (naviqasiya körpüsü), təhlükəsizlik və texniki modulları birləşdirir. Video görüntüləri təhlil edən sistem, həm gəmi heyətinə, həm də sahil komandalarına təhlükəsizlik qaydalarına əməl olunması barədə real vaxt rejimində məlumatlar ötürür.
İlkin sınaq mərhələsində müəyyən olunub ki, texnologiyanın təmin etdiyi əlavə görüntü imkanları mövcud iş rejimini dəyişmədən yüksək riskli fəaliyyətlərə fokuslanmağa və təhlükəli halları öncədən müəyyən etməyə kömək edir.
"Ultranav"ın Sığorta şöbəsinin rəhbəri Felipe Alberto Carrillo bildirib ki, "FleetVision" platforması əməliyyat risklərinə daha ardıcıl və strukturlaşdırılmış baxış bucağı yaradır. Bu şəffaflıq risklərin qiymətləndirilməsini gücləndirir, operativ komandalarla daha aydın müzakirələr aparmağa imkan verir və donanma üzrə idarəetməni təkmilləşdirir.
Bu addım gəmi heyəti ilə sahil rəhbərliyi (HSQES komandaları) arasında koordinasiyanın daha yüksək səviyyəyə çatdırılmasını hədəfləyir.
