Avropa İttifaqı Qırmızı dənizdə mühafizə missiyasının müddətini 2027-ci ilə qədər uzatdı
Avropa İttifaqı Şurası Qırmızı dənizdə ticarət gəmilərinin təhlükəsizliyini təmin edən "Aspides" əməliyyatının fəaliyyət müddətini 28 fevral 2027-ci ilə qədər uzatmaq qərarına gəlib.
“Seanews.az” xəbər verir ki, bu qərar bölgədəki strateji sabitliyi qorumaq və naviqasiya azadlığını təmin etmək məqsədilə qəbul edilib.
2024-cü ilin fevralından aktiv olan "Aspides", ABŞ-ın hücum mərkəzli əməliyyatlarından fərqli olaraq, yalnız gəmilərin müdafiəsi və müşayiəti ilə məşğul olur. Fəaliyyət göstərdiyi 23 ay ərzində missiya 1570-dən çox gəmiyə dəstək verib. Hazırda Yunanıstan, İtaliya və İspaniyanın təqdim etdiyi üç hərbi gəmi ilə əməliyyat davam etdirilir.
2025-ci ilin sentyabrından bəri husilər tərəfindən birbaşa hücum qeydə alınmasa da, təhdidlər davam edir. Hətta "Maersk" və "Hapag-Lloyd" kimi nəhəng şirkətlər regiondakı marşrutlarını bərpa edərkən hərbi müşayiətin vacibliyini vurğulayır.
Yeni müddət üçün əməliyyatın ümumi xərclərini qarşılamaq məqsədilə təxminən 15 milyon avro vəsait ayrılıb.
Bu qərar 1 mart 2026-cı il tarixindən qüvvəyə minəcək.
