Çin Gəmiqayırma Korporasiyası "CSIC" ilə birləşməni rəsmən tamamlayıb
Sentyabrın 16-da "China State Shipbuilding Corporation" (CSSC) Şanxay Fond Birjasında 3,053 milyard yeni emissiya olunmuş səhm siyahıya alaraq "China Shipbuilding Industry Company" (CSIC) ilə birləşməni rəsmən başa çatdırıb.
"Seanews.az" xəbər verir ki, birləşmənin yekunlaşmasından sonra CSIC birjadan çıxarılacaq və hüquqi statusu ləğv ediləcək. CSSC isə CSIC-in bütün aktivlərini, öhdəliklərini, biznes əməliyyatlarını, işçi heyətini, müqavilələrini və digər bütün hüquq və öhdəliklərini öz üzərinə götürəcək.
İnteqrasiya CSIC-in üç əsas gəmiqayırma zavodunu da əhatə edəcək. Bununla da, CSSC-nin aktivlərinin ümumi dəyəri 400 milyard yuanı (təxminən 56 milyard ABŞ dolları) keçəcək və şirkət dünyada ən böyük və ən geniş fəaliyyət sahəsinə malik siyahıya alınmış gəmiqayırma müəssisələrindən birinə çevriləcək.
Qeyd edək ki, 2024-cü ilin sentyabrında CSSC və CSIC səhm mübadiləsi əsasında birləşmə planını elan etmişdi. Bu plana əsasən, 2025-ci il iyulun 4-də Şanxay Fond Birjası CSSC-nin CSIC ilə birləşməsini təsdiqlədi.
CSIC 2008-ci ilin martında yaradılıb və 2009-cu ilin dekabrında siyahıya alınıb. Şirkət gəmi tədqiqatı, layihələndirmə və istehsalı ilə məşğul olurdu.
CSSC isə "China CSSC Holdings"-in qolu olaraq, həm hərbi, həm də mülki gəmiqayırma layihələri sahəsində ixtisaslaşıb.
