“HD Hyundai” Filippində yeni zavod açacaq
Cənubi Koreya nəhəngi “HD Hyundai” gələn ilin əvvəlində Filippində gəmiqayırma fəaliyyətlərinə başlamaq planlarını açıqlayıb.
“Seanews.az” xəbər verir ki, bu, “HD Hyundai”-nin “HD Hyundai Heavy Industries”-in yerli törəmə şirkəti “Agila Subic” vasitəsilə həyata keçiriləcək. Layihəyə “Cerberus Capital Management” də cəlb olunacaq. Amma əvvəlcə Maniladan təxminən 100 kilometr şimalda yerləşən Sabik körfəzindəki keçmiş ABŞ Hərbi Dəniz Qüvvələri bazasında 200 hektar ərazi üçün 10 illik icarə müqaviləsi imzalanmalıdır.
“HD Hyundai” növbəti 10 il ərzində bu müəssisəyə təxminən 550 milyon ABŞ dolları həcmində sərmayə qoymağı planlaşdırır. Zavodun maksimum illik istehsal gücü 10 gəmi səviyyəsində nəzərdə tutulur.
Müəssisə ilkin olaraq uzunluğu 250 metrə qədər olan tankerlərin tikintisinə diqqət yetirəcək. Hər bir gəminin tikinti müddəti 16–18 ay arasında planlaşdırılır.
