Qlobal dəniz axtarış və xilasetmə sistemlərinə dair ilk genişmiqyaslı araşdırmalar aparılacaq
Beynəlxalq Dəniz Axtarış və Xilasetmə Federasiyası (IMRF) və “Lloyd’s Register Foundation” qlobal miqyasda dəniz axtarış və xilasetmə (SAR - Search and Rescue) sistemlərinə dair ilk genişmiqyaslı araşdırmaya start verib.
“Seanews.az” xəbər verir ki, bu strateji qiymətləndirmə, yerli, milli və beynəlxalq səviyyələrdə SAR imkanlarını araşdırmaqla mövcud sistemlərdəki kritik boşluqları müəyyənləşdirməyi hədəfləyir.
Qiymətləndirmədə iqlim dəyişikliyi, geosiyasi qeyri-sabitlik və iqtisadi təzyiqlər kimi yeni yaranan çağırışların qarşıdakı 20 il ərzində SAR fəaliyyətlərinə necə təsir edə biləcəyi analiz olunacaq. Araşdırmaya yerli və milli SAR qurumları, dövlət orqanları, kommersiya gəmiçilik operatorları və kiçik balıqçılıq icmaları da cəlb edilib.
“Bu qlobal qiymətləndirmə mövcud çatışmazlıqları üzə çıxaracaq, ölkələrarası əməkdaşlığı gücləndirəcək və dünya üzrə daha təhlükəsiz dəniz gələcəyi üçün əsas yaradacaq,” – deyə IMRF-in baş direktoru Karolin Cüp bildirib.
