Süni intellekt “Equinor”a 2025-ci ildə 130 milyon dollar qənaət qazandırıb
Süni intellekt texnologiyalarından istifadə Norveçin enerji şirkəti “Equinor” və onun tərəfdaşlarına 2025-ci ildə 130 milyon ABŞ dolları dəyərində qənaət və əlavə dəyər yaradıb. Seanews.az-ın məlumatına görə şirkət bildirib ki, süni intellekt hazırda həm dəniz platformalarında, həm də qurudakı obyektlərdə sənaye proseslərinin təhlükəsiz, səmərəli və gəlirli şəkildə icrası üçün geniş miqyasda tətbiq olunur.
“Equinor”un texnologiya, rəqəmsallaşma və innovasiya üzrə icraçı vitse-prezidenti Heqe Skryseth qeyd edib ki, süni intellekt şirkətin fəaliyyətinin əsas hissəsinə çevrilib. Onun sözlərinə görə, bu texnologiya seysmik məlumatların daha sürətli təhlilinə, quyu planlaşdırılmasına, yataqların işlənməsinə və istehsal obyektlərinin daha effektiv idarə olunmasına imkan verir.
Məlumata əsasən, şirkət hazırda yüzdən çox süni intellekt tətbiqini müəyyən edib və onlardan bir neçəsi artıq praktik nəticə verib. Bunlara 700-dən çox fırlanan avadanlığın 24 min sensor vasitəsilə izlənməsi, texniki nasazlıqların əvvəlcədən proqnozlaşdırılması və gözlənilməz dayanma risklərinin azaldılması daxildir. Bu yanaşma 2020-ci ildən bəri 120 milyon dollar dəyərində qənaət yaradıb.
Bundan əlavə, “Johan Sverdrup” yatağının üçüncü mərhələsində süni intellektin köməyi ilə əvvəllər nəzərə alınmayan həll tapılıb və bu, tərəfdaşlığa 12 milyon dollar qənaət təmin edib. Şirkət süni intellektdən seysmik məlumatların şərhində də istifadə edir və bu texnologiya təhlil imkanlarını on dəfədən çox artırıb. Təkcə 2025-ci ildə bu üsulla 2 milyon kvadrat kilometr ərazi üzrə məlumatlar təhlil olunub.
“Equinor” bildirib ki, 2020-ci ildən indiyədək sənaye proseslərində süni intellektdən istifadə hesabına ümumilikdə 330 milyon dollar dəyərində fayda əldə olunub. Şirkət bu texnologiyanı eyni zamanda enerji sərfiyyatının optimallaşdırılması və karbon emissiyalarının azaldılması məqsədilə də tətbiq edir.
