• Bakı, 2021-10-27,
Seanews
Heyder Eliyev

Veteran dənizçi Səfail Əliyev 75 illik yubileyini qeyd edir

Veteran dənizçi, uzun illər Azərbaycan Xəzər Dəniz Gəmiçiliyinin sıralarında çalışan Səfail Əliyev 75 illik yubileyini qeyd edir.

Bu məqsədlə ASCO-nun Sosial inkişaf və nəqliyyat şöbəsinin və Dəniz Nəqliyyatı İşçiləri Həmkarlar İttifaqı Respublika Komitəsinin əməkdaşları yubiliyara baş çəkib, onu doğum günü münasibətilə təbrik ediblər.

Həmkarları ona ASCO-nun sədri Rauf Vəliyev başda olmaqla, bütün dənizçilərin xoş sözlərini çatdırıb, cansağlığı, uzun ömür arzulayıblar.

Səfail Əliyev 19 sentyabr 1946-cı ildə Astara rayonunun Rüdəkənar kəndində anadan olub. 1968-ci ildə Bakı Dəniz Yolları Məktəbini, 1977-ci ildə Odessa Dəniz Mühəndisləri İnstitutunu bitirib.

Əmək fəaliyyətinə 1968-ci ildə Xəzər Dəniz Gəmiçiliyində motorçu kimi başlayıb. Qısa müddətdə 4-cü, 3-cü, 2-ci və baş mexanik vəzifələrinədək irəliləyib.

1990-cı ildən “Xəzərdənizneftdonanma” idarəsində Donanmanın texniki istismarı xidmətində Xidmət rəisinin müavini, xidmət rəisi vəzifələrində işləyib. 2004-cü ildən baş mühəndis vəzifəsinə yüksəlib.

2007-ci ildə Xəzər Dəniz Neft Donanmasının Gəmi Təmiri Zavoduna direktor təyin edilib və 2009-cu ilədək bu vəzifədə çalışıb.

2012-2015-ci illərdə Azərbaycan Dövlət Dəniz Akademiyasının Dənizçilərin hazırlanması və sertifikatlaşdırılması mərkəzində direktor müavini olub.

2008-ci ildə “Əməkdar mühəndis” fəxri adına layiq görülüb. “Azərbaycan Xəzər Dəniz Gəmiçiliyinin 160 illiyi (1858–2018)” Azərbaycan Respublikasının yubiley medalı ilə təltif edilib. Azərbaycan Respublikası Prezidentinin fərdi təqaüdçüsüdür.


© Materiallardan istifadə edərkən hiperlinklə istinad olunmalıdır