BIMCO: Quru yük daşımalarında təklif–tələb balansı 2026-cı ildə sabit qalacaq, 2027-ci ildə isə zəifləmə gözlənilir
Quru yük daşımaları bazarında təklif və tələb balansı 2026-cı ildə əsasən sabit qalacaq, lakin 2027-ci ildə tələbin zəifləməsi və yeni gəmilərin tədarükünün sürətlənməsi fonunda bazarda təzyiqlər arta bilər.
"Seanews.az" xəbər verir ki, bu proqnoz BIMCO-nun quru yük bazarı üzrə icmalında yer alıb.
Qırmızı dəniz marşrutuna gəmilərin bu il və gələn il qayıtmayacağı ehtimalı əsasında hazırlanan proqnozlara görə, 2026-cı ildə yük tələbinin 2–3% artacağı, gəmi təklifinin isə 2,5% yüksələcəyi gözlənilir. 2027-ci ildə isə tələbin artım tempinin 1–2%-ə enəcəyi, eyni zamanda gəmi parkının 3% böyüyəcəyi proqnozlaşdırılır.
BIMCO-nun daşımalar üzrə analiz meneceri Filipe Qouveia bildirib ki, 2025-ci ildən gələn güclü bazar şəraiti hesabına 2026-cı ildə fraxt dərəcələri yüksək səviyyədə qala bilər: "Lakin 2027-ci ildə daha zəif bazar şərtlərini əks etdirərək dərəcələrin aşağı düşməyə başlamasını gözləyirik. Ümumilikdə, aşağı donanma artımı və artan üzmə məsafələrindən faydalanan capesize seqmentinin digər seqmentləri üstələməkdə davam edəcəyi ehtimal olunur”, – deyə Qouveia qeyd edib.
BIMCO bildirib ki, Qırmızı dənizə qayıdış ehtimalı son hesabatdan bəri artıb, çünki Qəzzada atəşkəs hələlik qüvvədədir.
Husilər tərəfindən gəmilərə son hücum 29 sentyabr tarixində qeydə alınıb və son aylarda Süveyş kanalı ilə keçidlərin sayı artıb.
