Gəmiçilikdə yaşıl dönüş sürətlənir – DNV-dən yeni HESABAT
Gəmiçilik donanmasının alternativ yanacaqlara hazırlığı sürətləndikcə, diqqət artıq yanacaq istehsalçılarına yönəlib.
"Seanews.az" xəbər verir ki, bu barədə DNV-nin dərc etdiyi “Maritime Forecast to 2050” hesabatında qeyd olunur.
Hesabata əsasən, alternativ yanacaqla işləyə bilən gəmilərin sayı 2028-ci ilə qədər demək olar ki, ikiqat artacaq. Bu prosesə əsasən ikili yanacaqla işləyən LNG gəmiləri rəhbərlik edəcək.
DNV Maritime CEO-su Knut Orbek-Nilssen bildirib: “2030-cu ilə qədər alternativ yanacaqla işləyən donanma illik təxminən 50 milyon ton neft ekvivalenti miqdarında qeyri-neft əsaslı yanacaq istehlak etmək gücünə malik olacaq. Bu rəqəm ümumi donanmanın illik 280 milyon ton neft ekvivalenti istehlakından az olsa da, qısa müddətdə böyük nailiyyətdir.”
DNV-nin hesablamalarına görə, 2030-cu ilə qədər IMO-nun emissiyaların 20% azaldılması hədəfinə çatmaq üçün donanmanın təxminən 25 milyon ton neft ekvivalenti aşağı-istixana təsirli yanacağa çıxış imkanı olmalıdır. Bu, qlobal səviyyədə bütün sənayelərin ehtiyacını ödəmək üçün nəzərdə tutulan 70–100 milyon ton neft ekvivalenti istehsalının təxminən üçdə birini təşkil edir.
“Gəmiçilik sənayesinin bu miqyasda öhdəlik götürməsi ilə yanaşı, yanacaq istehsalçılarının və infrastruktur inkişaf etdiricilərinin təchizatı sürətləndirməsi təcili zərurətə çevrilib,” – deyə DNV bəyan edib.
Hazırda alternativ yanacaqların istehlakı 1 milyon ton neft ekvivalenti həcmində qiymətləndirilir. Halbuki mövcud donanma və sifarişdə olan gəmilərin maksimum istehlak gücü 30 milyon ton neft ekvivalenti səviyyəsindədir.
Hesabatda həmçinin küləklə yardımçı hərəkət sistemlərinin (WAPS) tətbiqində sürətli artım qeyd olunub. Hazırda 64 gəmidə bu texnologiya quraşdırılıb, daha 84 sifarişdədir. Bu rəqəmə modernizasiya layihələri daxil deyil.
Orbeck-Nilssen əlavə edib: “Küləklə yardımçı hərəkət sistemlərində ciddi irəliləyişlər müşahidə olunur. Artıq bir sıra pilot və müstəqil yoxlama layihələri 2025-ci ildə başlayıb. Əgər bu layihələr uğurlu olarsa, bu texnologiyanın geniş tətbiqi dayanıqlı gəmiçilik üçün böyük bir dönüş nöqtəsi ola bilər.”
