ADNOC logistika bölməsinin 3 faiz payını satışa çıxarıb
Əbu-Dabi Milli Neft Şirkəti (ADNOC) öz logistika və xidmətlər bölməsindəki payının təqribən 3 faizini satışa çıxarıb.
"Seanews.az" bu barədə şirkətin məlumatına istinadən xəbər verir.
Məlumata görə, 222 milyonadək səhmin BƏƏ-də peşəkar investorlar və beynəlxalq institusional investorlar üçün təklif olunması nəzərdə tutulur.
Məsələyə bələd mənbənin məlumatına görə, cümə axşamı günü axşam saatlarınadək sövdələşmə tamamilə əhatə olunub və tələb təklif edilən səhmlərin sayını üstələyib. Qiymət və yerləşdirmə barədə məlumat bu gün açıqlanacaq, hesablaşmalar isə gələn həftənin əvvəlində həyata keçiriləcək.
Sövdələşmənin nəticəsində "ADNOC L&S"-in azad dövriyyədə olan səhmlərinin həcminin 22 faizə çatacağı və bunun da ticarət likvidliyini artıracağı gözlənilir.
2016-cı ildə yaradılan "ADNOC L&S" xam neft, neft məhsulları, quru yüklər və maye təbii qazın ixracını həyata keçirir. Şirkət hazırda 50-dən çox ölkədə 100-dən artıq müştəriyə xidmət göstərir.
Qeyd edək ki, bu satış şirkətin 2023-cü ildə keçirilən ilkin səhmdar təklifindən (IPO) sonra baş tutan ikinci böyük addımdır. Həmin vaxt ADNOC 769 milyon ABŞ dolları məbləğində vəsait toplayaraq bölmədə 81 faiz payını saxlamışdı.
ADNOC-un digər bölmələrində də oxşar əməliyyatlar aparılıb. Belə ki, bu ilin fevralında şirkətin qaz biznesində həyata keçirilən səhmdar təklifi nəticəsində 2,84 milyard dollar cəlb olunub ki, bu da son illərin Yaxın Şərqdəki ən iri sövdələşmələrindən biri hesab edilir.
Şirkət bu dəfəki yerləşdirmə üzrə səhmlərin qiymətini açıqlamayıb. Bununla belə, "ADNOC L&S"-in səhmləri cümə axşamı birjada 2,3 faiz artaraq 5,43 dirhəmə (1,48 ABŞ dolları) çatıb. Son bir ildə isə səhmlərin dəyərində 1,5 faizlik artım qeydə alınıb.
