Sığınacaqda müvəqqəti məskunlaşan benefisiarlar üçün gəmi-muzeyə ekskursiya təşkil olunub
Bakıda fəaliyyət göstərən sığınacaqların birində müvəqqəti məskunlaşan yetkinlik yaşına çatmayan benefisiarlar üçün "Suraxanı" gəmi-muzeyinə ekskursiya təşkil olunub.
Ekskursiyanın məqsədi uşaqların asudə vaxtının səmərəli təşkili, onların dünyagörüşünün genişləndirilməsi və mədəni-maarifləndirici fəaliyyətlərə cəlb olunmasıdır.
Tur çərçivəsində benefisiarlar Azərbaycanda dənizçilik ənənələri, milli gəmiçilik sənayesinin formalaşması və inkişafı, dənizdə neft hasilatının tarixi ilə yaxından tanış olublar. Uşaqlara “Suraxanı” tankeri, o cümlədən onun dəniz nəqliyyatı sahəsindəki rolu və muzeyə çevrilmə prosesi haqqında ətraflı məlumat verilib.
Ekskursiya iştirakçıları muzeydə nümayiş etdirilən tarixi eksponatlarla tanış olub, müxtəlif vizual və səsli təqdimatlara baxmaq imkanı qazanıblar.
