Gəmiçilikdə "Yanacaq çevrilməsi" texnologiyası sınaqdan keçirilir
“Lomarlabs” (“Lomar Shipping”in texnologiya mərkəzi) və “Blaze Energy” ticarət gəmiçiliyində alternativ yanacaqlara keçidi sürətləndirmək məqsədilə strateji tərəfdaşlığa başlayıb. Bu əməkdaşlıq çərçivəsində gəmi mühərrikinə inteqrasiya olunmuş, yığcam, üçüncü nəsil yanacaq çevrilməsi (reforming) sisteminin dəniz sınaqları keçiriləcək.
“Seanews.az” xəbər verir ki, “Blaze Energy”nin hazırladığı "Flex-Fuel Reformer" sistemi ammonyak, metanol və ya mayeləşdirilmiş təbii qazı (LNG) birbaşa gəmi göyərtəsində hidrogenə çevirir.
Hidrogenin mühərrikə daxil edilməsi ammonyak kimi gec yanan yanacaqların yanma prosesini sürətləndirir, səmərəliliyi artırır və zərərli tullantıları (ammonyak və metan sızması) azaldır.
Bu texnologiya gəmi sahiblərinə tək bir yanacaq növünə bağlı qalmamaq imkanı verir.
Sistem ilk olaraq ammonyak yanacağı üzərində sınaqdan keçiriləcək. Quru sınaqları və təsnifat cəmiyyətləri ilə razılaşmalardan sonra, pilot sistemin 2027-ci ilin əvvəlində “Lomar”a məxsus gəmidə quraşdırılması planlaşdırılır.
