“HMM” və “SK Shipping” arasında aylarla davam edən danışıqlar uğursuzluqla başa çatıb
Cənubi Koreyanın milli dəniz daşımacılığı şirkəti “HMM” rəsmi olaraq “SK Shipping”-nin tanker və quru yük donanmasını almaqdan imtina edib.
“Seanews.az” xəbər verir ki, aylarla davam edən danışıqlar tərəflərin qiymət məsələsində razılığa gələ bilməməsi səbəbindən başa çatıb.
“SK Shipping”-in əsas səhmdarı olan özəl investisiya şirkəti “Hahn & Company” “HMM”-nin “üstünlük verilən təklif sahibi” statusunun ləğv edildiyini açıqlayıb və şirkətin aktivləri üçün yeni alıcılar axtarmağa başladığını bildirib.
Bu hadisədən sonra “HMM” strateji istiqamətini dəyişmək qərarına gəlib. Şirkət satınalma yolu ilə deyil, yeni gəmi sifarişləri hesabına daşıma qabiliyyətini artırmağı planlaşdırır.
HMM ötən ilin sentyabr ayında böyük bir böyümə planı açıqlayıb. Şirkət 2030-cu ilə qədər donanmasını əhəmiyyətli dərəcədə genişləndirməyi hədəfləyir. Bu məqsədlə təxminən 17,5 milyard dollar həcmində investisiya nəzərdə tutulur. Planlara əsasən, konteyner donanması təxminən iki dəfə artırılacaq, tanker və quru yük donanmasındakı gəmilərin sayı isə 36-dan 110 gəmiyə çatdırılacaq.
