• Bakı, 2021-05-13,
Seanews
Heyder Eliyev

SOCAR "Ümid" yatağında tikiləcək platformalarla bağlı planlarını açıqlayıb

SOCAR bir neçə ildən sonra Xəzərin Azərbaycan sektorunda yerləşən "Ümid" yatağında ikinci hasilat platformasını tikib istismara verməyi planlaşdırır.

Bunu "APA-Economics"ə SOCAR-ın İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov deyib.

Onun sözlərinə görə, "Ümid-2" saylı platformanın layihələndirmə işləri hazırda davam edir: "Yatağın şimal qanadının tam miqyaslı işlənməyə cəlb edilməsi üçün "Ümid-2" saylı platformanın layihələndirmə işləri hazırda davam edir. Platformanın bir neçə il sonra tikilib istismara verilməsi nəzərdə tutulur", - İ. Əhmədov qeyd edib.

 

 

 

Qeyd edək lazımdır ki, hazırda "Ümid" yatağında qazın və kondensatın hasilatı "Ümid-1" (üç quyudan) saylı platformadan aparılır.  Ötən il Xəzərin Azərbaycan sektorunda yerləşən "Ümid" qaz-kondensat yatağından 1,09 mlrd. kubmetr qaz hasil edilib ki, bu da illik müqayisədə 28,2% çoxdur. 2020-ci ildə yataqdan 171 min ton qaz-kondensatı hasil edilib ki, bu da illik ifadədə 22,1% artım deməkdir.

"Ümid" yatağı 2010-cu ildə kəşf edilib. İlkin hesablamalara görə, yatağın ehtiyatı 200 mlrd. kubmetr qaz və 40 mln. ton kondensat həcmində qiymətləndirilir. "Ümid" yatağı 2012-ci ildə sənaye istismarına daxil edilib.

Xatırladaq ki, 2017-ci il yanvarın 12-də "Ümid" yatağının və "Babək" perspektiv strukturunun daxil olduğu dəniz blokunun kəşfiyyatı və işlənməsi haqqında SOCAR-la "SOCAR Umid Oil and Gaz Ltd." şirkəti arasında Risk Xidmət Sazişi imzalanıb. Bundan əlavə blokun kəşfiyyatı və işlənməsi üzrə neft-qaz əməliyyatlarının aparılması haqqında "SOCAR Umid Oil and Gas Ltd." şirkəti və "Umid, Babek Exploration & Production" şirkəti arasında müqavilə imzalanıb.


© Materiallardan istifadə edərkən hiperlinklə istinad olunmalıdır