2010-cu il istehsalı VLCC gündəlik 147 min dollara kirayəyə verilib
2010-cu ildə inşa edilmiş VLCC tipli neft tankeri sutkalıq 147 135 dollar dərəcəsi ilə kirayəyə verilib.
“Seanews.az” xəbər verir ki, “Scrubber” sistemi ilə təchiz olunmuş “Kalamos” gəmisi bu yüksək tariflə icarəyə götürülüb. Hazırda Hindistanın qərb sahilləri yaxınlığında yerləşən gəmi “Embiricos” tərəfindən istismar olunur, kirayəçi kimi isə “IOC” göstərilir.
Bu müqavilə iri tonnajlı neft tankeri bazarında gəlirlərin yüksək qalması fonunda bağlanıb. Brokerlər bildirirlər ki, xüsusilə köhnə, lakin işlək VLCC gəmilərinə tələbat yüksək olaraq qalır.
“Fearnleys” broker şirkətinin məlumatına görə, hazırda VLCC seqmentində tariflərin artmasına Cənubi Koreyanın “Sinokor” şirkətinin bazarda mövcud gəmilərin böyük hissəsinə nəzarət etməsi də təsir göstərir. Bu, təklifin məhdudlaşmasına və qiymətlərin yüksəlməsinə səbəb olur.
Ekspertlər hesab edirlər ki, iri tanker donanmasının bir neçə böyük operatorun nəzarətində cəmləşməsi bazarda qiymət formalaşmasına ciddi təsir göstərərək gəmilərin vaxtında tapılmasını çətinləşdirə bilər.
