CMES metanol ilə işləyən 9 300 avtomobillik gəmisini təhvil alıb
“China Merchants Energy Shipping” (CMES) şirkəti dünyanın ilk 9 300 avtomobil daşıma qabiliyyətinə malik metanol ilə işləyən iki yanacaqlı avtomobil və yükdaşıma gəmisini (PCTC) rəsmi olaraq təhvil alıb.
"Seanews.az" xəbər verir ki, 220 metr uzunluğa malik “CM Hong Kong” adlı gəmi “China Merchants Industry” tərəfindən inşa edilib və Honq-Konq bayrağı altında üzəcək.
Gəmidə 13 yük göyərtəsi var və o, avtomobil, yük maşını, avtobus, ağır texnika, həmçinin hidrogen və təbii qazla işləyən yeni enerji vasitələri də daxil olmaqla, müxtəlif yükləri daşıya bilir.
“CM Hong Kong” metanol ilə işləyən əsas mühərriklə təchiz olunub və Beynəlxalq Dəniz Təşkilatının (İMO) ən yüksək ekoloji standartlarına cavab verir. Bu, gəminin havaya atılan zərərli qazları ciddi şəkildə azaltması deməkdir. Metanoldan istifadə zamanı gəmi ənənəvi dəniz yanacaqları ilə müqayisədə istixana qazı tullantılarını 70 faizdən çox azaldır.
Bu gəmi CMES-in sifariş verdiyi altı metanol ikiqat yanacaqlı PCTC-dən birincisidir.
