"Grimaldi" ilk ammonyakla işləməyə hazır avtomobildaşıyan gəmisini təhvil alıb
İtaliyanın "Grimaldi Group" gəmiçilik şirkəti ən yeni avtomobil və yükdaşıyan gəmisini (PCTC) təhvil alıb. “Grande Shanghai” adlanan gəmi Çin Xalq Respublikasında yerləşən "China Merchants Heavy Industry Haimen" tərsanəsində inşa edilən və hər biri 9 000 avtomobil daşımaq gücünə malik beş PCTC seriyasının birincisidir.
"Seanews.az" xəbər verir ki, gəmilərin layihələndirilməsini Danimarkanın "Knud E. Hansen" dəniz memarlığı firması həyata keçirib.
Gəminin uzunluğu 220 metr, eni 38 metr, ümumi tutumu 93 145 GT, sürəti isə 18 düyün təşkil edir. O, 14 avtomobil göyərtəsi ilə təchiz olunub və həm elektrik mühərrikli, həm də ənənəvi yanacaqla işləyən nəqliyyat vasitələrini daşımaq imkanına malikdir.
“Grande Shanghai” "Grimaldi" donanmasında “ammonia ready” təsnifat nişanı alan ilk gəmi olub. Bu onun gələcəkdə alternativ yanacaq kimi ammonyak istifadəsinə çevrilə biləcəyini təsdiqləyir.
Bundan əlavə, gəmi RINA təsnifat cəmiyyətindən “green plus”, “green star 3”, “comfort vibration” və “comfort noise port” kimi əlavə ekoloji və komfort göstəricilərinə dair sertifikatlar əldə edib.
“Grande Shanghai” yaxın günlərdə Çinin Taicang limanından yola çıxaraq, "Grimaldi" qrupunun ötən ilin iyununda istifadəyə verdiyi Şərqi Asiya–Şərqi Afrika marşrutu üzrə ilk səfərinə başlayacaq. Gəmi əvvəlcə Keniyanın Mombasa, daha sonra Tanzaniyanın Dar əs-Salam limanlarına çatacaq.
