Türkiyədə İndoneziya üçün yeni raketdaşıyan hücum katerinin tikintisinə başlanılıb
Türkiyənin “Sefine” Gəmiqayırma Zavodunda İndoneziya Hərbi Dəniz Qüvvələrinin sifarişi ilə inşa ediləcək iki yeni raketlə silahlanmış sürətli hücum katerindən (FAC) birinin təməli qoyulub.
“Seanews.az” xəbər verir ki, layihə “Sefine “zavodunun daha əvvəl hazırladığı sürətli hücum kateri dizaynının təkmilləşdirilmiş variantı əsasında həyata keçirilir.
Gəmi 70 metr uzunluğa, 11,8 metr enə, 2,85 metr suya oturma dərinliyinə malik olacaq.
Silahlanmaya bir ədəd 76 mm-lik dəniz topu, yerüstü hədəflərə qarşı raketlər və iki ədəd 12,7 mm-lik pulemyot daxil olacaq. Bundan əlavə, idarəolunan raket hücumlarından müdafiə məqsədilə gəmi əks tədbirlər üçün sistemlə təchiz ediləcək.
Elektron avadanlıq kompleksi hava və səth axtarış radarları, naviqasiya radarları, atəş idarəetmə radarı, diferensial GPS (DGPS), dərinlikölçən və avtomatik identifikasiya sistemi (AIS) ilə təchiz olunacaq.
Yeni hücum katerlərinin vəzifələri sırasında yerüstü hədəflərə qarşı döyüş əməliyyatları, hava hücumundan müdafiə, kəşfiyyat, müşahidə və izləmə fəaliyyətləri, həmçinin axtarış-xilasetmə missiyaları yer alacaq.
