Dünyada dəniz və yük nəqliyyatında saxta daşıyıcılar və oğurluq təhlükəsi artır
Beynəlxalq Dəniz Sığortası İttifaqı (IUMI) və Daşınan Aktivlərin Müdafiəsi Assosiasiyası (TAPA) xəbərdarlıq edir: dünya miqyasında yük oğurluğu və dələduzluq sürətlə artır.
“Seanews.az” xəbər verir ki, xüsusilə Latın Amerikası və Afrikanın bəzi bölgələrində zorakı hücumlar çoxalır, eyni zamanda cinayətkarlar ənənəvi oğurluqlardan rəqəmsal fırıldaqçılıqlara keçir. Yəni saxta daşıyıcı və “fantom yük” halları ciddi təhlükə təşkil edir. Cinayətkarlar oğurlanmış kimliklər, saxta sənədlər və klonlanmış şirkət məlumatlarından istifadə edərək yükü ələ keçirirlər. TAPA EMEA prezidenti Torsten Neumann bildirir ki, süni intellekt bu fırıldaqçılıqları daha da genişləndirə bilər.
2022–2024-cü illərdə 129 ölkədə təxminən 160 000 yük oğurluğu qeydə alınıb, zərər isə milyardlarla avroya çatıb. 2024-cü ildə Şimali Amerikada zərər 455 milyon dollar olub, Avropa, Yaxın Şərq və Afrikada isə son iki ildə 108 000-dən çox oğurluq baş verib. Yalnız Almaniyada 2025-ci ildə fantom daşıyıcı halları kəskin artıb.
IUMI baş katibi Lars Lange vurğulayır ki, yük mübadilə platformaları saxta daşıyıcıların qarşısını almaqda həlledici rol oynayır. Tövsiyələrə daşıyıcı və sürücülərin davamlı yoxlanması, sənədlərin təsdiqi, təhlükəsiz dayanacaqlardan istifadə və nəqliyyat vasitələrinin real vaxt monitorinqi daxildir.
Rəqəmsal fırıldaqçılıq Avropa və Şimali Amerikada önə çıxsa da, Braziliya və Cənubi Afrikada zorakı oğurluqlar hələ də geniş yayılıb və bu, qlobal yanaşmanın zəruriliyini göstərir.
