Pakistan dənizçiləri batmış gəmidən 9 heyət üzvünü xilas ediblər
Pakistan Hərbi Dəniz Qüvvələri avqustun 9-da Ərəbistan dənizində Qvadar yaxınlığında batan Hindistana məxsus yelkənli gəminin 9 heyət üzvünü xilas edib. “Camna Sagar”ın göyərtəsində 10 heyət üzvü olub.
“Seanews.az”-ın məlumatına görə, təhlükə siqnalını aldıqdan sonra Pakistan Dəniz İnformasiya Mərkəzi hadisə yerinə yaxın olan “Mt Kruibeke” yük gəmisindən qəza vəziyyətində olan gəminin heyətinə lazımi yardım göstərməyi xahiş edib. Pakistan Hərbi Dəniz Qüvvələrinin bəyanatında deyilir ki, doqquz heyət üzvü sudan çıxarılıb, bundan sonra yük gəmisi Dubay limanına doğru səyahətini davam etdirib və orada sahilə çıxarılıb.
Ölən heyət üzvünün cəsədinin suda tapıldığı hadisə yerinə iki helikopterin dəstəyi ilə Pakistan Hərbi Dəniz Qüvvələrinə məxsus gəmi gəlib. O, əlavə araşdırma üçün Pakistan Dəniz Təhlükəsizliyi Agentliyinə (PMSA) təhvil verilib.
