“RoPax” tipli beş gəminin tikintisi üçün müqavilə imzalanıb
Niderlandın “Damen Shipyards Group”-u Malayziyanın “Penang Port Sdn Bhd” gəmiçilik şirkəti ilə “RoPax” tipli beş gəminin tikintisi üçün müqavilə imzalayıb. Gəmi inşaatçılarının məlumatında bu gəmilərin sərnişin-yük daşıyan bərələr olduğu bildirilir.
“Seanews.az” xəbər verir ki, Battervort ilə Penanq adası və Corctaun arasında bərə keçidinə xidmət göstərəcək yeni gəmilər maksimum 250 sərnişin və 50 nəqliyyat vasitəsini daşımaq üçün nəzərdə tutulub.
Bərələrin 2023-cü ilin ortalarında sifarişçiyə təhvil verilməsi planlaşdırılır. Onların hər il təxminən 2,5 milyon sərnişin və 1,5 milyon ikitəkərli avtomobil daşıyacağı ehtimal edilir.
“Damen Shipyards Group”-u 35 gəmiqayırma və gəmi təmiri zavodunu birləşdirir. Bu günə qədər qrup 6000-dən çox gəmi inşa etmişdir. Təkcə 2020-ci ildə şirkət sifarişçilərə 143 gəmi təhvil vermişdi.
