Ciddə limanında inteqrasiya olunmuş logistika parkı tikiləcək
Ciddə limanında gələcəkdə Səudiyyə Ərəbistanının ən böyük parkına çevriləcək logistika parkının təməlqoyma mərasimi keçirilib.
“Seanews.az”-ın məlumatına görə, park 225 min kvadratmetr sahədə yerləşəcək.
Layihəyə 346 milyon dollar sərmayə qoyulacaq. Bərpa olunan enerji mənbələrindən istifadə etməklə logistikanın karbonsuzlaşdırılması probleminin həlli planlaşdırılır. Logistika parkı 65 min kvadratmetrdən çox sahəyə malik damda günəş panellərinin istehsal etdiyi enerjinin 100%-ni alacaq. Bundan əlavə, parkda daşınma üçün istifadə olunan yük maşınları elektriklə işləyəcək.
Gömrük və qeyri-gömrük anbar və paylama (W&D) obyektləri parkın ümumi sahəsinin 70%-dən çoxunu əhatə edəcək, ərazinin qalan hissəsi isə yükaşırılması, hava daşımaları və ümumi yüklər üçün istifadə olunacaq. “W&D” hissəsində ümumi anbar və soyuq zəncir üçün bir neçə fərqli bölmənin yaradılması nəzərdə tutulur. Bundan əlavə, obyektdə xüsusi elektron ticarət mərkəzi də yaradılacaq.
İnteqrasiya edilmiş logistika parkının ildə 200 min TEU-ya qədər yük işləyə biləcəyi gözlənilir.
