Banqladeşin gəmi emalı sənayesində son 20 ilin ən aşağı göstəricisi qeydə alınıb
İstismardan çıxarılan gəmilərin təkrar emalında dünya lideri hesab edilən Banqladeşin gəmi söküntüsü sənayesi 2024-cü ildə görünməmiş bir geriləmə yaşadı. Keçən il emal üçün Cənubi Asiyaya 144 gəmi (968 000 ümumi tonaj) göndərilib ki, bu da 2005-ci ildən bəri ən aşağı göstəricidir. Müqayisə üçün deyək ki, indiyədək orta illik göstərici 2 milyon ton olub.
“Seanews.az” xəbər verir ki, bu barədə “Shipping Inbox” nəşri məlumat yayıb.
Banqladeş dünyada köhnəlmiş gəmilərin demək olar ki, yarısını metal qırıntıları üçün təkrar emal edirdi. 2021-ci ildə rekord sayda - 280 gəmi (2,73 milyon ümumi tonaj) ləğv etdi. 2022-ci ilə qədər bu rəqəm iki dəfə azalaraq 1,14 milyon tona düşdü. Ötən il daha aşağı göstərici qeydə alındı.
Nəşr qeyd edir ki, gəmiqayırma sənayesində aktivliyin kəskin azalmasına bir sıra amillər səbəb olub. Avropa və Yaxın Şərqdəki geosiyasi gərginlik beynəlxalq gəmiçilik marşrutlarını və təchizat zəncirlərini pozdu və Qırmızı dəniz böhranı 2024-cü ildə köhnə gəmilər də daxil olmaqla əlavə tonajlara tələbatın artmasına səbəb oldu. Bundan əlavə, keçən il metal qırıntılarının qiymətlərinin aşağı düşməsi sənayenin problemlərini daha da artırdı.
Eyni zamanda, Banqladeşdəki tənəzzül Hindistanda gəmisökmə sənayesinin inkişafı ilə müşayiət olundu, bu sahəyə 100 milyon dollardan çox maliyyə vəsaiti ayıran Hindistan 120 “yaşıl” gəmisökmə müəssisəsi yaradıb.
Banqladeş son on ildə yalnız 5 belə müəssisə yarada bilib ki, bu da gəmilərin təkrar emalı bazarında qabaqcıllığını təhlükə altına alır. Hindistanın “Care Edge” reytinq şirkətinin məlumatına görə, 2023-cü ildə dünyada metal qırıntılarına çevrilmiş ümumi tonajın 46%-i Banqladeş, 33%-i isə Hindistanın payına düşüb. Bununla belə, Hindistanın beynəlxalq ekoloji tələblərə və imkanlara uyğunluğu artdıqca, balans dəyişə bilər.
